पाढ्यांची गाणी – १६ ते २०

पाढ्यांच्या गाण्याबाबतचे निवेदन वाचले नसल्यास इथे वाचा.

सोळाचा पाढा – देऊळ आणि घर

सोळा एके सोळा । मातीचा बनवला गोळा ॥

सोळा दुणे बत्तीस । त्याचा केला कळस ॥

सोळा त्रीक अठ्ठेचाळ । कळस हवा जसे कमळ ॥

सोळा चोक चौसष्ट । कमळाच्या पाकळ्या चौसष्ट ॥

सोळा पंचे ऐंशी । कमळाखाली पाने जैशी ॥

सोळा सक शाहाण्णव । कळसाखाली कृष्ण देव ॥

सोळा सत्ते बारोदरसे । देवळाजवळ घर लहानसे ॥

सोळा आठे अठ्ठाविसासे । घरात राहायला हवीत माणसे ॥

सोळा नव्वे चव्वेचाळासे । आई बाबा ताई भाऊसे ॥

सोळा दाही साठासे । देवळात वाजती ढोल ताशे ॥

• मंगला द. मुंडले

---

सत्राचा पाढा – गणपतीचा प्रसाद

सत्रा एके सत्रा । आमंत्रण करुया मित्रा ॥

सत्रा दुणे चौतीस । त्यांना बोलावू प्रसादास ॥

सत्रा त्रीक एकावन । चतुर्थीला पुजू गजानन ॥

सत्रा चोक अडुसष्ट । प्रसाद देऊ मूठ मूठ ॥

सत्रा पंचे पंचाऐंशी । मित्रांना घेऊ हाताशी ॥

सत्रा सक दुवोदरसे । खोबरे किसूया हातासरसे ॥

सत्रा सत्ते एकोणिसासे । दाणे सोलू वार्‍यावरसे ॥

सत्रा अठ्ठे छत्तीसासे । खारका कुटूया हळू हळूसे ॥

सत्रा नव्वे त्रेपन्नासे । तीळ धुवूया पाण्यावरसे ॥

सत्रा दाहे सत्तरासे । गुळात मिसळून प्रसाद होतसे ॥

• मंगला द. मुंडले

---

अठराचा पाढा – पावसाची तयारी

अठरा एके अठरा । विकत आणला पत्रा ॥

अठरा दुणे छत्तीस । आता येईल पाऊस ॥

अठरा त्रीक चोपन्न । कपडे जातील भिजून ॥

अठरा चोक बाहात्तर । कपडे घालू वाळवल्यावर ॥

अठरा पंचे नव्वद । मग होइल आनंद ॥

अठरा सक अष्टोदरसे । पत्र्याचे केले आडोसे ॥

अठरा सत्ते सव्वीसासे । कपडे धुवून होतिल ऐसे ॥

अठरा आठे चव्वेचाळासे । वाळत घालू हातासरसे ॥

अठरा नव्वे बासष्टासे । वाळलेले काढू ऐसे ॥

अठरा दाहे ऐंसासे । मुले पावसा देती पैसे ॥

• मंगला द. मुंडले

---

एकोणीसचा पाढा – असे खाल्ले कणीस

एकोणीस एके एकोणीस । विकत आणले एक कणीस ॥

एकोणीस दुणे अडतीस । कणसाला पडले पैसे तीस ॥

एकोणीस त्रीक सत्तावन । मग घेतले धुवून ॥

एकोणीस चोक शाहात्तर । भाजून घेतले त्यानंतर ॥

एकोणीस पाचा पंचाण्णव । लिंबू मीठ तिखट लाव ॥

एकोणीस सक चौदोदरसे । दाणे काढले हातासरसे ॥

एकोणीस सत्ते  तेहेतीसासे । सार्‍यांना दिले हातावरसे ॥

एकोणीस अठ्ठे बावन्नासे । सुके मके भाजून कसे ॥

एकोणीस नव्वे एकाहत्तरासे । बटमोगरीचे फूल जसे ॥

एकोणीस दाहे नव्वदासे । मुलामुलींना आवडे खासे ॥

• मंगला द. मुंडले

---

वीसचा पाढा – परकर-पोलका

वीस एके वीस । मुली येथे येउन बैस ॥

वीस दुणे चाळीस । नेसवीन परकर पोलक्यास ॥

वीस त्रीक साठ । परकर चोळी जरी काठ ॥

वीस चोक ऐंशी । बसंती रंग अंग रेशमी ॥

वीसा पाचा शंभर । परकर शिवला चुणीदार ॥

वीस सक विसासे । पोलक्याचे हात उडती कसे ॥

वीसा साते चाळासे । गळपट्टीला चंद्रहार असे ॥

वीसा आठा साठासे । बटणावर फुलपाखरू वसे ॥

वीस नव्वे ऐंसासे । परकराला गोंडा असे ॥

वीस दाहे दोनशे । परकर नेसुन खेळ ग हर्षे ॥

• मंगला द. मुंडले

Hits: 34