पाढ्यांची गाणी – सहा ते दहा

पाढ्यांच्या गाण्याबाबतचे निवेदन वाचले नसल्यास इथे वाचा.

सहाचा पाढा – भारतातील प्रेक्षणीय स्थळे

सहा एके सहा । कुठे काय पाहा ॥

सहा दुणे बारा । ताजमहाला आग्रा ॥

सहा त्रीक अठरा । औरंगाबादी मकबरा ॥ (बिबीका मकबरा)

सहा चोक चोवीस । कुतुबमिनार दिल्लीस ॥

सहा पंचे तीस । बोलघुमट विजापुरास ॥

सहा सक छत्तीस । प्रतापगड वाईस ॥

सहा सत्ते बेचाळ । लेणी अजिंठा वेरूळ ॥

सहा अठ्ठे अठ्ठेचाळ । अमृतसरी सोन्याचे देऊळ ॥

सहा नव्वे चौपन । काश्मीर हे तर नंदनवन ॥

सहा दाही साठ खरे। एवढे तरी पहा बरे ॥

• मंगला द. मुंडले

सातचा पाढा – गांधीजी

सात एके सात । गांधीजींना दंडवत ॥

सात दुणे चौदा । त्यांचा पोषाख साधा ॥

सात त्रीक एकवीस । नेसती खादीच्या पंचास ॥

सात चोक अठ्ठावीस । दुसरा वरती अंगास ॥

साता पाचा पस्तीस । तिसरा कपडा न अंगास ॥

सात सक बेचाळ । बोलणे त्यांचे ना वायफळ ॥

साती साती एकोणपन्नास । नेमे पाळिति मौनास ॥

साती आठी छप्पन्न । साधे घेती पूर्णान्न ॥

सात नव्वे त्रेसष्ट । स्वभाव त्यांचा स्पष्ट ॥

सात दाहे सत्तर होती । त्यांना राष्ट्रपिता म्हणती ॥

• मंगला द. मुंडले

आठचा पाढा – कसे जेवावे?

आठ एके आठ । बैस घेउन पाट ॥

आठ दुणे सोळा । जेवायला घेई थाळा ॥

आठ त्रीक चोवीस । पाणी पिण्या घेई ग्लास ॥

आठ चोक बत्तीस । मांडी घालून बैस ॥

आठा पंचे चाळीस । तूप साखर पोळीस ॥

आठ सक अठ्ठेचाळ । भात जेवी जिरेसाळ ॥

आठी साती छप्पन । वरती गोडे वरण ॥

आठी आठी चौसष्ट । लोणचे घेई चविष्ट ॥

आठा नव्वे बाहात्तर । साजुक तुपाची धार ॥

आठ दाहे ऐंशी म्हणावे । सारे पान चक्क करावे ॥

• मंगला द. मुंडले

नऊचा पाढा – म्हणींचे गाणे

नऊ एके नऊ । सुसरबाईची पाठ मऊ ॥

नऊ दुणे अठरा । पालथ्या घड्यावर पाण्याच्या धारा ॥

नऊ त्रीक सत्तावीस । मोर होइना लावुन पीस ॥

नऊ चोक छत्तीस । भाई गेला जागा पैस ॥

नवा पाचा पंचेचाळ । कुर्‍हाडीचा दांडा गोतास काळ ॥

नऊ सक चोपन्न । ज्वर येता कडू अन्न ॥

नवा साता त्रेसष्ट । असंगसंगे प्राणाशी गाठ ॥

नवा आठे बाहात्तर । कर नाही तर कशाला डर ॥

नव्वे नव्वे एक्याऐंशी । अग अग म्हशी मला कुठे नेशी ॥

नऊ दाहे नव्वद झाले । म्हणींचे गाणे जुळून आले ॥

• मंगला द. मुंडले

दहाचा पाढा – असे वागावे (२६/८/१९८१)

दहा एके दहा । तुम्ही असे वागून पहा ॥

दहा दुणे वीस । सकाळी लवकर उठावेस ॥

दहा त्रीक तीस । उरकी प्रातर्विधीस ॥

दहा चोक चाळीस । नंतर जाशी स्नानास ॥

दहा पाचे पन्नास । मग बस अभ्यासास ॥

दहा सक साठ । पाढे करी पाठ ॥

दहा साते सत्तर । लिहून काढी प्रश्नोत्तर ॥

दहा आठे ऐंशी । पुस्तक नीट वाचशी ॥

दहा नव्वे नव्वद । कविता करिशी मुखोद्गत ॥

दाही दाही शंभर होती । अशा मुलाला शहाणा म्हणती ॥

• मंगला द. मुंडले

Hits: 57