अंकगीते

आकडे एक ते दहा (१)

एक दोन एक दोन । बाबांचा आला सईला फोन ॥

तीन चार तीन चार । म्हणती खेळू नकोस फार ॥

पाच सहा पाच सहा । रडू नकोस हसत रहा ॥

सात आठ सात आठ । नवा धडा झाला का पाठ ॥

नऊ दहा नऊ दहा । आणिन खाऊ म्हणति पहा ॥

• मंगला द. मुंडले

आकडे एक ते दहा (२)

एक दोन एक दोन । अंकलिपी द्या आणून ॥

तीन चार तीन चार । पाटीवर मग लिहिणार ॥

पाच सहा पाच सहा । लिहून झाला धडा पहा ॥

सात आठ सात आठ । करीन मग तोंडपाठ ॥

नऊ दहा नऊ दहा । सगळे धडे शिकतो पहा ॥

• मंगला द. मुंडले

आकडे एक ते दहा (३)

एक दोन एक दोन । सरस्वतीचे करु पूजन ॥१॥

तीन चार तीन चार । आपण घालू तिजला हार ॥२॥

पाच सहा पाच सहा । तिजपाशी मागू वर हा ॥३॥

सात आठ सात आठ । धडा करूया रोज पाठ ॥४॥

नऊ दहा नऊ दहा । अर्पू देशा प्राण हा ॥५॥

• मंगला द. मुंडले

आकडे एक ते दहा (४)

एकी एकी एक । इकडे येरे विवेक ॥

एकी दुर्की दोन । हातपाय घेई धुवून ॥

एकी तिर्की तीन । बैस मांडी घालून ॥

एकी चौकी चार । अभ्यास आता करणार ॥

एकी पाची पाच । पुस्तक घेउन वाच ॥

एकी साही सहा । नवा धडा वाचून पाहा ॥

एकी साती सात । आता झाली रात ॥

एकी आठी आठ । म्हणा उजळणी पाठ ॥

एकी नव्वे नऊ । एवढे तरी करून घेऊ ॥

एकी दाही दहा । विवेकचा पहिला धडा हा ॥

• मंगला द. मुंडले

आकड़े एक ते दहा (५)

या गीतात एक ते दहा आकडे सांगताना महापुरुषांची नावे त्यांच्या आईच्या नावासोबत गुंफली आहेत.

एकी एकी एक । कोण कुणाचे लेक ॥१॥

एकी दुरकी दोन । पुतळाबाइचे मोहन ॥२॥

एके तिरकी तीन । सरोजिनीचे बिपीन ॥३॥ (बिपीन = बिपीनचंद्र पाल)

एकी चौकी चार । स्वरुपाराणीचे जवाहर ॥४॥

एकी पाची पाच । जिजाचे शिवाजी महाराज ॥५॥

एकी साही सहा । देवकीचा कृष्ण हा ॥६॥

एकी साती सात । पार्वतीचा बळवंत ॥७॥ (बळवंत = लोकमान्य टिळक)

एकी आठी आठ । नाती करा पाठ ॥८॥

एकी नव्वे नऊ । आपण सारे बहीण भाऊ ॥९॥

एकी दाही दहा । पाढा झाला पाहा ॥१०॥

• मंगला द. मुंडले

चिमण्यांची वजाबाकी

दहा बाई चिमण्या चिऊ चिऊ । एक गेली उडून उरल्या नऊ ॥

नउ चिमण्यांचा चिवचिवाट । एक गेली उडून उरल्या आठ ॥

आठ चिमण्यांची चिवचिव घरात । एक गेली उडून उरल्या सात ॥

सात चिमण्यांचा वावर पहा । एक गेली उडून उरल्या सहा ॥

सहा चिमण्यांचा चाललाय नाच । एक गेली उडून उरल्या पाच ॥

पाच चिमण्यांची चिव चिव फार । एक गेली उडून उरल्या चार ॥

चार चिमण्यांची चिव चिव छान । एक गेली उडून उरल्या तीन ॥

तीन चिमण्यांतिल चिवचिवते कोण । एक गेली उडून उरल्या दोन ॥

दोनच चिमण्या चिवचिव कितीक । एक गेली उडून उरली एक ॥

एकच चिमणी चिवचिव करते । ती गेली उडून की शून्यच उरते ॥

मंगला द. मुंडले

वन टू वन टू

वन टू वन टू । ट्रिप काढूया छोटू ॥

थ्री फोर थ्री फोर । रानी पाहू बगळा मोर ॥

फाइव सिक्स फाइव सिक्स । भेळपुरी हवी मिक्स ॥

सेवन एट सेवन एट । बरोबर घेऊ क्रिकेट सेट ॥

नाइन टेन नाइन टेन । उद्याच गाठू पहिली ट्रेन ॥

• मंगला द. मुंडले

Hits: 28