पावसाची गाणी

पाऊस -१

देवाच्या बाळाचा वाढदिवस होता । खूप खूप खाऊ करायचा होता ॥१॥

बरीच येणार होती पाहुणी । म्हणून खूप भरलं पाणी ॥२॥

हांडे कळशा मातीचे रांजण । पातेल्या वाट्या डबे अन् झाकणं ॥३॥

बाळाचे मित्र जमा झाले । आंधळी कोशिंबीर खेळू लागले ॥४॥

खेळता खेळता झालं काय । भरल्या भांड्यांना लागला पाय ॥५॥

पाणी लागलं सांडायला । पाऊस लागला पडायला ॥६॥

• मंगला द. मुंडले (२८/७/१९६९)

पाऊस – २

सागरात होतं खूप खूप पाणी । गरम झालं उन्हाने ॥१॥

तापून त्याची झाली वाफ । आकाशात गेली आपोआप ॥२॥

त्याचा झाला निळा काळा रंग । आपण त्याला म्हणतो ढग ॥३॥

फुग्यात जशी असते हवा । तसा ढगात पाण्याचा ठेवा ॥४॥

आकाशात होते ढगांची दाटी । पळतात पुढे जाण्यासाठी ॥५॥

पळता पळता होते टक्कर । ढग फुटतात भराभर ॥६॥

त्यातून थेंब ओघळतात । त्यालाच पाऊस म्हणतात ॥७॥

• मंगला द. मुंडले (२८/७/१९६९)

पावसा पावसा

पावसा पावसा । सांग मला असा । आभाळातून खाली । येतोस कसा ॥१॥

आहे कारे तुझी । छोटी छोटी माडी । तेथूनच मारतोस का । एकदम उडी ॥२॥

घड घड वाजते ती । तुझी कारे गाडी । कशी आहे सांग त्याला । बैलांची जोडी ॥३॥

चमचम करतं । ते तुझं कारे विमान । तेच फक्त आहे । खरं वेगवान ॥४॥

सांगू नको पावसा । सारं सारं कळलं । ढगांच्या पॅराशूटने । आकाशच भरलं ॥५॥

वाटेल तेव्हा येतोस । अन् करतोस खोड्या । मारते कारे आई । मग विजेच्या छड्या ॥६॥

• मंगला द. मुंडले (३०/३/१९७०)

पावसाच्या सरी

(चाल पारंपरिक)

येग येग सरी । खेळू आम्ही बाहेरी ॥

येई तू ग धावून । आम्ही जाऊ भिजून ॥

पाणी लागेल साचू । त्यात आम्ही नाचू ॥

पाणी लागेल वाढू । त्यात नावा सोडू ॥

नकोत मोठ्या सरी । आई बोलविल माघारी ॥

• मंगला द. मुंडले (१५/७/१९८२)

Hits: 44